شیخوپورہ: جی ٹی روڈ پر مسافربس ٹرالر سے ٹکرا گئی، 5 افراد جاں بحق، 12 شدید زخمی

شیخوپورہ: شیخوپورہ میں جی ٹی روڈ پر سادھوکی کے قریب مسافر بس ٹرالر سے ٹکرا گئی، حادثے میں 2 کمسن بچوں سمیت 5 افراد جاں بحق اور 12 شدید زخمی ہوگئے، زخمیوں کو مریدکے اور لاہور کے ہسپتالوں میں منتقل کردیا گیا۔سیالکوٹ سے صادق آباد جانے والی مسافر بس شیخوپورہ میں جی ٹی روڈ پر سادھوکی کے قریب تیزرفتاری کے باعث آگے جانے والے ٹرالر سے ٹکرا گئی جس سے 2 بچوں سمیت اور ایک خاتون سمیت 5 افراد موقع پر ہی جاں بحق ہوگئے جبکہ 12 شدید زخمی ہوگئے، ریسکیو1122 نے فوری امدادی کاروائی کرتے ہوئے بس کی باڈی کو کاٹ کر زخمیوں کو نکالا اور تحصیل ہیڈکواٹرز ہسپتال مریدکے اور میوہسپتال لاہور منتقل کیا جہاں متعدد زخمیوں کی حالت نازک بتائی جاتی ہے۔ریسکیو حکام کے مطابق جاں بجق ہونے والوں میں 1 سالہ زبیر، 3 سالہ عمیر، ایک خاتون صائمہ صدیق اور ایک نامعلوم شخص شامل ہے۔ جاں بحق اور زخمیوں میں زیادہ تر لوگوں کا تعلق دنیاپور سے ہے۔